Тәртіп ережесі

Мектеп формасы: Оқушылар мектеп бекіткен біріңғай үлгідегі бордо түсті сарафан (сайтымыздың мектеп формасы бөлімінде көрсетілгендей) және ақ түсті классикалық кофта (блузка) киюге міндетті. Сарафанның ұзындығы тізеден төмен болуы тиіс.

Сырт келбет әдебі:

• Шашты ұқыпты жинау (өру немесе түйю) міндетті, шашты жайып жүруге рұқсат етілмейді.
• Шашты ашық, жасанды түстерге бояуға тыйым салынады.
• Тырнақты шектен тыс өсіруге және ашық түсті лак қолдануға болмайды.
• Көзге қатты түсетін, ірі зергерлік бұйымдар тағуға, бетті тым бояуға (макияж) тыйым салынады.

Қауіпсіздік: Мектепке денсаулыққа зиянды, тез тұтанғыш немесе өткір заттарды алып келуге қатаң тыйым салынады. Ереже бұзылған жағдайда оқушы әкімшілік жауапкершілікке тартылады.

Жеке мүлік: Мектеп ғимаратында интернет-модульдері бар құрылғыларды (смартфон, планшет) пайдалануға тыйым салынады. Оқу үдерісіне қажет болған жағдайда тек мұғалімнің рұқсатымен қолданылады.

ІІ. Сабақ уақытындағы этика және тәртіп
Үлкенге құрмет: Сыныпқа мұғалім немесе кез келген ересек адам кіргенде, оқушылар орнынан тұрып, ілтипатпен амандасуы тиіс.

Академиялық адалдық: Оқушы үй тапсырмасын орындауға, күнделік толтыруға және барлық қажетті оқу құралдарын (кітап, дәптер) әкелуге міндетті.

Сөйлеу мәдениеті: Сабақ үстінде шулауға, өзгелерді алаңдатуға болмайды. Жауап бергісі келген немесе сұрақ қойғысы келген оқушы қолын көтеріп, мұғалімнің рұқсатын күтеді.

Дене шынықтыру: Спорттық форма мен аяқ киім міндетті. Денсаулығына байланысты босатылған қыздар сабақ аяқталғанша спорт залда мұғалімнің бақылауында болуы тиіс.

Сабақтан босатылу: Оқушы тек ата-анасының өтініші немесе дәрігер анықтамасы негізінде, мектеп директорының рұқсатымен ғана сабақтан босатылады.

ІІІ. Үзіліс және қоңырау кезіндегі тәртіп
Биязылық пен инабаттылық: Мектеп дәлізінде жүгіруге, айқайлап күлуге, бейәдеп сөздер айтуға тыйым салынады. Қыз бала өзін сыпайы, мәдениетті ұстауы тиіс.

Тазалық: Әр оқушы өз партасының және сыныптың тазалығына жауапты. Қағаз қалдықтарын немесе қоқыстарды тек арнайы жәшіктерге тастау керек.

Қозғалыс тәртібі: Дәлізде, баспалдақта оң жақпен жүріп, мұғалімдер мен қонақтарға жол беру — қыз баланың әдептілігінің белгісі.

Асхана мәдениеті: Ас ішер алдында және кейін қол жуу, кезек сақтау, тамақтанып болған соң өз ыдысын жинап кету — міндетті талап.

ІV. Жауапкершілік және қорытынды
Мүлікті сақтау: Мектеп мүлкін (парта, пано, гүлдер т.б.) бүлдіруге болмайды. Материалдық шығын келген жағдайда ата-анасы жауап береді.

Аманатқа адалдық: Табылған бөгде заттарды дереу кезекші мұғалімге немесе әкімшілікке тапсыру қажет. Өзгелердің жеке заттарын рұқсатсыз алу ұрлық болып саналады.

Тыйымдар: Мектеп ішінде және ауласында діни немесе экстремистік үгіт-насихат жүргізуге, діни сипаттағы киімдер киюге қатаң тыйым салынады.

Бақылау: Осы ережелердің орындалуын сынып жетекшілері мен мектеп әкімшілігі қадағалайды.